Bir teklif geldi: kurmaa eni okul dersi – «Halk oyunu»

Опубликовано 22 февраля
Bir teklif geldi: kurmaa eni okul dersi – «Halk oyunu»

Gagauz artistik öndercileri umutlanȇrlar, ki bu iş “yapacak, ani korulsun gagauz kultura kimlii hem adetleri”.

Başküüyün “Lale” adlı oyun kolektivin artistik öndercisi Mariya Dobrioglo söler, ki halk oyunun okul programasına koyulması “vakıtça pek uygun”.

“Eer bu olarsa, bän - bir horeograf olarak - pek kısmetli kendimi duyacam. Zerä, gidip düünnerä, bän görerim nicä gençlär oynȇȇrlar halk horusunu. Burada daymaca var nasıl gülmää, deyni insannar oynamȇȇrlar, ama... kaçȇrlar. Halk oyunnarı Gagauziyada insan arasında az yayınlanılmıştır bir iş, bunu lääzım doorutmaa”, - dedi Mariya Dobrioglo GRT radio efirindä.

Eer bişey yapılmaysa, ozaman “birkaç yıldan sora bizim millet adet oyunlarımız kaybeleceklär”, söleer horeograf.

“Yaşlı insannar, angıları taa biler oynamaa halk oyunnarını, yavaş-yavaş gider. Bizim ardımızda sa biz bişey brakmȇȇrız. Eer biz bün bişey yapmarsak, kaybedecez onu da, ne bizdä var”, - ekledi Mariya Dobrioglo.

Başküü liţeyin Tuzlov adına direktor yardımcısı Oksana Razgradskaya sayȇr, ki okulda “Halk oyunu” uşakların güüdäycä ilerlemesini gelişlendirecek.

“Kötü olmayacaydı, eer okullarda koyaydılar bölä bir disţiplina, çünkü bu yardım edeceydi uşaklara taa islää akılını işletmää, hepsini akılında tutmaa; logika düşünmesinin uurunda yardım edeceydi hem da - bu artık lafsız! - Gagauz Erindä yaşayan halkların kulturasına hem adetlerinä bu bir korumak hem ilerlemäk olacaydı”, - açıkladı umutlarını Oksana Razgradskaya.